انصاف ئولؤب

دنیاده کلک حاکیم اولوب یوخدی بیلن

هر جاهیل اوکوز عالیم اولوب یوخدی بیلن 

آق ساققال اولوب  کندیمیزین چالواداری 

هر ایشده  جلوداریم اولوب یوخدی بیلن 

قانمازلارینان کیم باجاریب منده بیری 

امما اودا روحانیم اولوب یوخدی بیلن 

بیلمز نه دی دین یا کی شریعت نه اولار 

احکامیده استادیم اولوب یوخدی بیلن 

تعظیم ائلییر شیطانا قرآنی الینده 

شرمنده مسلمانیم اولوب یوخدی بیلن 

اسلام دینی چوخ یاخجیدی گر بیلسه بشر 

افسوس آدی اسبابیم اولوب یوخدی بیلن 

کور شیطان اولوب گورمه گه گوزلر ایشیقی 

غافل نییه انسانیم اولوب یوخدی بیلن 

حققین دادی شیریندی ولی شرطی آجی 

شرطینده چوخ اهمالیم اولوب یوخدی بیلن 

آلاه بوزاماندا هامو دای تولکی اولوب 

قوردین آدی بهتانیم اولوب یوخدی بیلن 

دوستلار کی ائده ردی منه قوربان جانینی

جان آلماقا جلّادیم اولوب یوخدی بیلن 

باخ سن نئجه گور قایدا دؤنؤب انصاف ئؤلؤب 

دشمن باجی قارداشیم اولوب یوخدی بیلن 

انساندا گرک اخلاق اولا یاخجیسی چوخ 

بیر ذره سی درمانیم اولوب یوخدی بیلن 

حیوان لارینان باش باشا وئردیک عومؤری

انسانلیقا تک آدیم اولوب یوخدی بیلن 

هر فتنه شرین عاملی انسان دی ولی 

شیطان نییه الراجیم اولوب یوخدی بیلن 

چوخ حقی دئییب ائتدیک عمل باطیلینه 

شاهد اونا قرآنیم اولوب یوخدی بیلن 

آنناخلی آدام چوخدی جهاندا تاپاسان 

نادانلاری غم خواریم اولوب یوخدی بیلن 

انسان نییه چوخ حیوانا رحمت اوخویور 

بو مسئله اسراریم اولوب یوخدی بیلن 

هرجمعیده حقین طرفین ساخلامیشام 

آلچاق نییه دیواریم اولوب یوخدی بیلن 

اعجازیله یارب منه بیر چاره یئتیر

حق دوستلاری دشمانیم اولوب یوخدی بیلن 

"زاهد" یئدیلر حققی من اولدؤم نگران 

آلاه اوزی دیلداریم اولوب یوخدی بیلن  

زعفر نظرزاده زاهد هیجدهم آذر سال نود فخرآباد