عزراییل

عزراییل گلدی قفیلدن جان آلان گلدی گئنه

چکیلؤن اَیْری کمانلا اوخ آتان گلدی گئنه

قورخولی هئیبتی واردی نه ده گور اَیْری باخیر

گوره نین زهری یاریلدی قوجا خان گلدی گئنه

بیلمورم منده نه گوردی باخیب هئی گؤلدی منه

اولمیا وقتسیز ئولومدی بو زامان گلدی گئنه

گاه گلیب پنجره میزدن منه هئی قاش گوز آتیر

گاه قفیلدن گوروسن کی باجادان گلدی گئنه

یوخسا بیر جیندی گلیبدی منی قورخود ماق ایچون

نئچه یول ایتدی گوزومنن سورادان گلدی گئنه

توزاناق سالدی ائوه باسدی دؤمان گوزله ریمی

ائله بیل تؤستی قویؤب تؤلکی بوغان گلدی گئنه

بیرآغاج ووردی باشیمنان کاسادان چیخدی گؤزؤم

اوندا بیلدیم کی اجل دی آلا جان گلدی گئنه

دئدی عومرون قوتاریب دور منیلن گئدمه لی سن

سنی اوز طایفا ائلونن آییران گلدی گئنه

قورخودان شالوارا وئردیم سورا گوردوم یوخیدی !

دئدیلر چیخ قاپییا یولچی ایمان گلدی گئنه

گوزومی آچدیم اویاندیم یوخی دوشدی باشیما

یاتمادیم صبحه کیمی گوزله ره قان گلدی گئنه

نئچه گون صبر ائله دیم فالچی خؤدؤش کنده گله

تا دییه م کی یؤخؤما جیننی خوخان گلدی گئنه

فال آچیب سونرا دئدی خوش حالووا "زاهد" اوغول

سنه اون یئتدی قوناق آستارادان گلدی گئنه

دئدیم آللاه هامویا بوغدا گلیر تای تایینان

منه ده های هایینان ائو داغیدان گلدی گئنه

شعر : زعفر نظرزاده زاهد فخرآبادی

اردبیل 31/03/1390 هجری شمسی